反送中运动至今已持续超过100 天，民间争取的除了“五大诉求”，还有对香港警队所作所为的调查与谴责。
这星期，警务处处长卢伟聪向警务人员发表公告，形容过去100 日“是他在警察生涯中最难忘的一段日子”，又称将会于警队历史上留下“不能磨灭的印记”。他又安慰同僚，管理层会採取一切可行措施，照顾同事的福利及家庭需要，“力求让大家能够在无后顾之忧的环境下履行职务”。
这100 天，香港警察做过的事，很多人在媒体镜头、直播片段中看得一清二楚，然而面对这场运动（或他们理解的“暴动”），香港警察究竟在想什麽？
为了解警员心态，反送中运动爆发至今，《立场新闻》三次访问现役警员阿峰（化名），访问分别于6 月中（6.12 冲突后）、6 月底（示威者两度包围警总后）及8 月底进行。
阿峰在警队任职多年，亦接受过机动部队训练，但这场运动他没有在冲突前线执勤；他只是三万人警察队伍的其中一员，意见亦绝不能代表所有警务人员，但透过他的自白，我们至少可一窥这100 天于镜头以外，香港警察在想的是什麽——即使大家未必同意。
（下文经由《立场新闻》记者整理三次访问内容，以第一人称写成。文中的“我”是受访者警员阿峰。）
“社会冲突警队埋单”
现在警队的气氛，其实都几得意。明明仍是非常时期，但大家好像都惯了这是常态。照理这不应是常态，无理由日日预咁少人返工，大多数同事都要出去做暴动。
以前我们每更返8 小时45 分钟，现在每更12 小时45 分钟。返多咗嘅，可以拣放假或者补钱。一开头有些同事雄心壮志，话梗係唔放假，赚多啲，但过一排，大家都攰啦。
之前出去做暴动的同事，会好兴奋咁返嚟分享出面的所见所闻。现在少咗。可能因为讲来讲去都係，射几个催泪烟，搞几轮，拉几个人。开头好似好特别，现在不是了—其实大多数香港人都係咁啦，慢慢会麻木。
《逃犯条例》呢件事会搞到咁大，我係好surprised 嘅。
其实打得警察呢份工，大多都係支持政府，就算唔支持都会扮支持啦，但今次件事开始的时候，只讲条例，真係不太多人支持。喺警署大家讲开，或者canteen 电视播开讲两句，我听唔到有人话，“梗係要立啦！呢啲仆街要拉！”无听过类似的说话。
甚至6 月9 日前，我听到好多同事吹水讲，唉其实政府係咪真係要咁急推呀，台湾都话唔驶啦。咁急推，啲人反抗会好大。我自己都係咁谂，明显无迫切性你又要咁样搞，社会就会有冲突，社会有冲突咁边个埋单？咪警队埋单囉。
我觉得今次我们被人put on the table 仲严重过佔中。我唔知林郑月娥係咪有intention 跣警队一镬，但你係将警队放在一个磨心位，喂大佬，条《逃犯条例》又唔係我话立，係你要立嘛阿姐，你自己出嚟同人解释啦。
但我们食君之禄担君之忧，係咪先？我收你人工，无办法就要被你夹上轿。
“Training 係咁教”
网上好多人话警察好暴力乜乜，喂，我们往往睇返，即使喺facebook、甚至主流媒体replay 出嚟的片段，成日都断章取义，你攞住后面嗰part 出嚟讲，咁梗係警察错啦，好似无端端狂揼人，但你冇咗头part 喎。
所以我的同事係非常之嬲嘅，整个气氛都唔好，因为呢堆被剪辑过的片段，不断在这个世界流传，以至好多无去过现场的人，或者有去但企得好后、唔知发生咩事的人，都觉得差人係癫嘅。
我明白对一些无受过警察训练的人来说，会觉得好ridiculous。但我们的训练係咁样嘅：once 警务处处长宣布呢场係暴动的时候，在现场appear 的所有人都係暴徒，我们唔会再推测，呢个人係咪善意。因为一旦进入暴动的模式，就再唔係警察对一个人的场面，而是一个大型的活动，简单来说，就是battle 和war 的分别。
处理暴动的training 係无差别的，唔会针对你掟过嘢，所以我揼你，你无掟过嘢我就请你离开…一定无差别的，因为武器的设计就係无差别，催泪弹。当警务处处长宣布得暴动，要驱散，根据我们的training，你企喺度，甚至跪喺度，都已经唔可以容许。因为我们在现场，只有一对眼望住前面，唔会知道后面发生咩事，可能你唔去揼前面无端端坐喺度嗰条友、唔射支烟过去，会引发后面好大的问题。
你话呢个准则合唔合理，我唔识答。但我们别无选择，必须咁样做。
作为警务人员，你要信呢套训练会work。你出人工就係做这件事。你唔会谂，佢好惨喎，我们可否同情佢？如果有同事在现场，见到有市民只不过企喺度狂闹警察，于是觉得“点解我要向佢射催泪烟？唔劝佢走？”…如果一个受过完整机动部队训练的同事，仍讲出这句说话，我觉得係非常不成熟的警务人员。这个人也不适合做警察—佢唔係坏人，甚至係好人添，但这份工真的不适合佢。
你事后觉得我今日好罪恶，要辞职，fine；但係大佬呀，你唔係低人工嘛，三皮几四皮嘢一个月，真係因为你叻仔咩？就係买你忠心之嘛。
“暴动mode”的源头
听到不少人说，为何香港警察突然变成这样的？每次一进入“（处理）暴动mode”，每个警员的行为、动作、反应，以至情绪，都好像变了另一个人。
我想，这个跟我们接受的训练有关。例如以前在学堂，七成时间都在练步操，教官会要求一讲一个口令，就进入另一个模式去操；另一个训练是，夜晚全部人训哂觉，教官会静鸡鸡入嚟，捉走其中一个—当然唔畀佢出声啦—然后睇下捉走几多个，班学警先发觉。
这些训练好改变到我。我们慢慢会进入一个状态，无论任何时间都要好有alertness。
机动部队训练就更加。它的成立、就係要处理公众集会，甚至暴动。出学堂之后，我哋会去唔同环头工作，大多数同事在半年至两年之内会被召入机动部队，接受为期三个月的训练，大部分都係防暴的训练。
机动部队训练係比学堂辛苦100 倍，好Q 辛苦。因为大部分时间都放在体能同战术训练上面，举哑铃、掌上压、跑步就唔提了，重中之重就是防暴操，着哂三、四十磅的防暴装备上身，在烈日当空之下受训，而且是好密集式的训练。教官好严格，由你入去第一日，屌到你出去嗰日，每样嘢都会同你计时，例如烧烟前要防毒面具，25 秒要全个队完成哂—听落好简单？但一队人唔可以全部一齐上mask，否则戴紧时会被人打。25 秒，係分批完成哂。
又例如有种训练叫ETO，emergency turnout。成班人本来在更衣室好优悠自在，食紧鸡，听紧收音机，突然有人走入嚟嗌ETO，成班人就要跑住咁着衫，落去攞枪，短时间内上哂gear，随时上车行得，呢个训练係成日做的。
例子仲有好多。和平集会，我们的模式係点；暴动的，模式又係点。教官一声号令，就要转。有时明明叫你去一个方向跑，叫一声就全班人180 度转…全部训练，都要你在短时间内进入另一个状态。
还有，PTU（机动部队）成日讲一样嘢，叫“震慑力”，所以你成日会见到同事黑起块面、爆哂粗，somehow 可能佢不是太嬲，但会appear to be 一个好有震慑力的状态，这也是training 的一部分。当然有好多同事收工都转唔返mode，咪有好多家庭悲剧发生囉。
我年轻时受训，当时香港社会气氛无咁複杂，我仲好肯定，练完呢套嘢，一世都唔会用啦。我的同事、上级都係咁讲：你练啦，满足下啲staff 啦，反正一世都唔会用啦。当时我也会幻想下，第日兵荒马乱，就会以英雄姿态、正义之师咁平息暴乱…我无乜谂过，呢件事係啱唔啱。
随着年纪渐大，我会谂，一个社会係咪需要一班防暴警察？个人觉得任何社会都需要。好似一把枪，摆喺度你可以用来打猎，你可以用来杀人，把枪係唔会决定前面的目标应否被射击，而是揸枪的人怎去用。
所以我不觉得暴动训练有何问题，而是决策的人怎去使用—这才是问题。
“拖垮警队太天真”
有些事我是想解释一下的。
出面讲到警察形象好似好差，但对我每日工作有无明显影响呢？其实好少。
你做前线警察就会知，真的好像平行时空一样。出面示威暴动讲到好憎人差人，但你每日行街，香港人真係好得意，佢哋好似变返驯良的市民。
有一个例子。我间差馆虽然唔係“大港”（即旺角、尖沙咀等大警署），但之前都被人围过。围完，第二日有超多街坊送嘢嚟，几乎每个钟都有人，卡呀，花呀，係有李偲嫣之流，但更多是平民百姓，有三十岁出头的买个礼盒过嚟，仲有个阿婆，大热天时，带咗啲烚好的鸡蛋，还有一箱水…你话佢係亲中爱国团体策动？我点都唔信。
所以係咪新闻所讲，地区街坊都好讨厌差人，真係未必是一面倒。甚至有些同事会说，这些才是真街坊；平日夜晚那些，是示威者扮的。
另一个误会是，有些暴徒话想拖垮警队。我想讲，警察攰就係梗係有，但如果他们真係咁谂，其志可嘉，但未免太天真。你要知道，我们係出住几皮嘢人工，有政府公帑support，出入有冷气车，仲有精良装备。攰的话，警队会安排冷气地方给我们睡觉，每日有免费饭盒食…我们是这样跟他们打消磨战的。
六月底有人包围警总。我识得一些同事，当时在警总入面standby。佢哋话好爽，咩都唔驶做，日日食鸡、上网，粮水又充兄—警察总部有四万个杯麵，全部大碗装、十几蚊的出前一丁。大家以为佢哋一定係含辛茹苦咁守护警总，但原来咁轻鬆。
“无见过基层咁憎管理层”
发展到今时今日，我们当然好憎示威者—as worse as 示威者睇差人囉，100%同事都会叫佢哋做“曱甴”。
但好多基层同事，包括我，同样好憎管理层，即係警务处处长、副处长等。
大家一向都唔锺意卢伟聪，6 月12 日之前嗰秒，都仲觉得佢係一个废柴，睇死佢实举棋不定，但6.12 之后，其实係有改观，因为佢今次真係果断咗，好快就宣布暴动。如果上次旺角骚乱佢係0 分，6.12 令佢至少加到50 分。
但之后又跌返落去。转捩点係第一次围警总，好多同事都好嬲，唔係嬲示威者包围，而係嬲点解警队管理层容许呢件事发生，呢个不单关乎士气、尊严，警队是紧急服务的机构，总部被包围，在其他地方已是紧急状态，点解管理层唔做嘢？唔係不能，係不为。于是好多同事大惑不解，气氛变到非常差，好憎恨管理层。
之后6 月底，管理层做过好多嘢，上面几隻神兽（处长、副处长、高级助理处长）係咁发信，话会好保护每位同事，而家咁做，係因为打紧一场仗云云，又有高层不停走访唔同警署，但讲真，无可能可以平息到警察的愤怒。我真係未见过基层咁憎管理层，讲粗口就必然啦。
而家每日记者会，眼见到佢哋拙劣的沟通技巧，真係闻者伤心听者流泪，我真係觉得不如唔好讲啦。
憎管理层仲有好多原因。更重要是他们的决策失误，不时令到伙计落单，陷入危险的局面。例如机场那单（8.13），好彩伙计无掹枪连随开一飞，呢个你无得怪佢，被人打到咁样，分分钟会死嘛，但之后示威者的情绪会更加激进。
如果开咗枪，呢个完全係RRC（Regional Response Contingent，总区指挥大队）的问题，係你摆佢喺一个无得选择的position，明明应该可以避免的。
不过，虽然对上头好多不满，但“屌住做”一向都是警队文化。你话警队多唔多牢骚？好多，多到如果你斋听佢讲嘢，唔睇佢做嘢，会以为警队就嚟灭亡、叛变；但口裡说不，身体却很诚实，警队的特质係“屌住做”，你order 嚟到，就唔会再谂乜嘢，事后做完又屌，下次又做。你话会唔会有一日会爆？真係答你唔到，但警队近200 年都未爆吖。
警察誓词第一句
以前我好紧张警队形象，但近年会谂，以前香港警察形象好只是bonus，因为全世界没一支警队形象係好。
好多人有个美丽误会，警队当然有一部分职能是服务市民，塞车就告车，你被人偷嘢就帮你捉贼，你唔见咗个仔就帮你搵返。但亦有好大部分职能，其实係拥护政权。点解我们要做防暴演习呢？防暴本身已是维护政权的行动。市民出来暴动，其实是反映对政权的不满嘛，如果单纯是服务市民，唔好话帮佢，至少唔应该阻止。
但警队点解要做防暴演习？要有防暴队？基本上就係拥护政权。我们一向都是政治工具，你锺唔锺意都好，这是客观事实。
这三个月，好多人拎返香港警察誓词出嚟，话咩“不畏惧、不徇私、不对他人怀恶意”…其实大家知唔知香港警察誓词第一句係咩？
係“本人会竭诚依法为香港特别行政区政府效力为警务人员”—无论如何，我们都是拥护香港特别行政区政府。无呃你啦。
|
网友
发表于 2019-09-22
收藏
刷新卡
置顶卡